Si Stan ay isang security guard sa Quezon Province. May asawa at tatlong anak. Mahirap ang kanilang buhay at lalu pa itong humirap nang mag-expire ang kanyang lisensya. Walang lisensya, walang “duty”, walang kita. Napilitan silang mag-asawa na mamutol ng kahoy upang gawing uling at ibenta para may pambili sila ng pagkain. Dahil dito, nahinto sa pag-aaral ang kanilang mga anak.
Isang araw, tumawag ang kanyang biyenan na napatira sa Sto. Nino sa Lipa, Batangas. Inaya silang lumikas at makipisan sa kanilang bahay sa Lipa. Nangutang sila ng pamasahe upang makarating sa Lipa. Subali’t di pa rin makakuha ng trabaho si Stan. Hirap pa rin sila sa buhay at di maaring umasa lang sa biyenan na maliit lamang din ang kinikita.
Isang araw, nabalitaan nya sa pamangkin na mayroong naghahanap ng Piggery Boy o katulong sa babuyan sa Baranggay Sampaguita sa Lipa. Dahil walang pamasahe, naglakad si Stan hanggang makarating sa lugar at nakilala nya ang mga may-ari na sina Bro. Pabling at Sis.Amy. Dahil sa regular na trabaho ay nagbago ang buhay nila Stan. Isinama rin silang mag-asawa sa Familia Community kung saan nakilala nila ang isang buhay kasama ang Diyos.
Grasya at biyaya ng Panginoon na nakilala ni Stan ang kaniynag mga amo na naglapit sa kanya sa Diyos. Grasyang nagbigay ng gihawa sa buhay at nakapagpatapos ng mga anak. Noon, kadena ng kahirapan ang dinanas ni Stan. Ngayon, kadenang nag-uugnay sa Panginoon ang kaniyang pinanghahawakan.